کتاب

Latest News

د فروید ارواپوهنه

چهارشنبه, 18 دلو 1396 04:17

د فروید ارواپوهنه کتاب د امریکایي پوهنتون ویسترن ریزرف د استاد کالوین اس هال لیکلی اثر دی چې په لومړي ځل پښتو ژبې ته ډاکتر محب الله زغم ژباړلی او په ننګرهار کې زیار خپرندویې ټولنې چاپ کړی دی.
زیګموند فروید چې د معاصرې ارواپوهنې پلار بلل کېږي، پښتو ژبې ته یې دا لومړی را ژباړل شوی اثر بلل کېږي. د کتاب لیکوال موخه دا ده چې د نوموړي ارواپوهنه په لنډه، واضحه او سیستماتیکه توګه معرفي کړي، څو د ارواپوهنې پوهنپالان او د دې څانګې مینه وال ورڅخه د یوې معتبرې سرچینې په توګه کار واخلي.
په ټوله کې لیکوال لومړی د فروید پېژندنې او د هغه د میراث په اړه بحث کوي، له هغه وروسته د شخصیت په اړه د فروید نظریات را اخلي. لیکوال دا هڅه نه ده کړې چې په دې رساله کې د نوموړي نظریات په تنقیدي مبحث کې هم تشریح کړي، بلکې دا یې لازمه بللې چې لومړی د نوموړي ټول اړوند نظریات د اساساتو په توګه لوستونکو ته د واحدې سرچینې څخه وړاندې کړي.
د پورته موضوع له تشریح وروسته د شخصیت د جوړښت په اړه ارواپوهنیز بحث شوی دی او همدارنګه له هغې وروسته د شخصیت ډاینامیک تر عنوان لاندې د شخصیت مهم او متحرک عناصر تشريح شوي دي، له هغه وروسته د شخصیت وده په مفصله توګه تشریح شوې ده او د کتاب په وروستي څپرکي کې د سالم شخصیت په اړه بحث شوی دی.
د کتاب پښتو ژباړن، یاد کتاب په مجموع کې له فارسي ژبې څخه را ژباړلی او بیا یې د متن پرتله له اصلي متن سره کړې، پښتو ژباړن ته د فارسي ژباړن ډېرې نیمګړتیاوې په لاس ورغلې او توانېدلی چې یوه معیاري ژباړه لوستونکو ته وړاندې کړي. بلخوا د پښتو متن په تصحیح کې ښاغلي صدیق الله بدر او ښاغلي محمد یار یار بشپړ دقت کړی دی او د پښتو ژباړن ډېرې ټایپي او نورې د تصحیح اړوند ستونزې یې په نښه او حل کړې دي.
په ټوله کې ویلی شم چې د فروید په اړه دا کتاب له موږ سره د نوموړي په پېژندنه، نظریاتو او د ارواپوهنې د نویو مبحثونو په پراختیا کې د معلوماتو د تحلیل او وړاندوینې مهمه زېرمه ده.
د دې ژباړې یوه ښېګڼه دا ده چې ژباړن د ځینو مبهمو موضوعاتو په اړه خپل معلومات شریک کړي چې د ژباړې په بډاینه کې یې ډېره مرسته کړې ده او هم لوستونکي ته د سهولت سبب شوې ده.
که زموږ په هېواد کې د فرهنګي هڅو پیاوړتیا ته د جایزو او نورو هڅوونکو عناصرو په مټ کار کېدای نو دا ژباړه به هم د ډېرو معیارونو لرونکې او د جایزې وړ پېژندل شوې وه.
یاد کتاب په ۱۹۵۴ز کال په نیویارک کې د ((A primer of Freudian Psychology)) تر عنوان لاندې چاپ شوی دی، ۱۲۹ مخونه لري او پښتو بڼه یې ۱۴۰ مخونه لري.
د یادونې وړ ده چې د دې کتاب انګرېزي بڼه په اکسوس کې شته او په قوي احتمال سره د هېواد په نورو کتابپلورنځيو کې د ترلاسه کېدو وړ نه ده.
مینه وال کولای شي یاد کتاب په کابل کې له اکسوس کتابپلورنځي څخه په مناسبه بیه ترلاسه کړي او هم کولای شي د دې کتابپلورنځي د رسونې پروګرام څخه په ګټنې په کابل کې خپل کور او کار ځای ته د خپلې اړتیا وړ کتابونه ور وغواړي.

د ارګ ناويلې خبرې

چهارشنبه, 11 دلو 1396 04:37

د ارګ ناویلې خبرې کتاب چاپ شو. یاد کتاب د حامد کرزي د واکمنۍ پر مهال د ملي امنیت شورا د فرهنګي چارو د پخواني مشر ښاغلي محمد اسعمیل یون د سیاسي خاطراتو تازه ټولګه ده.
کتاب نولس څپرکي، ۸۳۵ مخونه لري او د افغانستان ملي تحریک خپور کړی دی.
د کتاب پیل د ښاغلي شېرعلم امله وال پر تقریض شوی دی. نوموړي یاده ټولګه یو ژوندی تاریخ او د واقعیتونو هېنداره بللی دی. د کتاب په لومړي څپرکي کې د دغه کتاب وجودي فلسفه او د ارګ تاریخچه بیان شوې ده. په دويم څپرکي کې لیکوال دا په ډاګه کوي چې په سیاسي ژوند کې یې له سیاستوالو سره لومړنۍ پېژندګلوي څنګه وشوه او تر دې مخکې پر کومو دندو بوخت و. په درېيم او څلورم څپرکي کې د نوي اساسي قانون د جوړېدو بهیر او د لومړیو ولسمشریزو ټاکنو په اړه د ليکوال یادښتونه، خاطرې او شننې شریک شوي دي.
د کتاب د بحث ټول تمرکز پر دې دی چې په هېواد کې فاسدې کړۍ افشا شي، ښې حکومتولۍ ته لاره هواره شي او اوسنی نسل پر دې پوه کړي چې پر سیاسي برخلیک یې څوک د لوبې چانس پیدا نه کړي.
د کتاب په نورو څپرکو کې هم د لیکوال په باور مهم معلومات ځای پرځای شوي دي چې د هېواد د سیاسي تاریخ په بډاینه کې ورڅخه د یوې کره سرچینې په توګه استفاده کېدای شي.
د کتاب لیکوال د کابل پوهنتون استاد او یو فرهنګي خادم دی چې د پښتنو په ویښتابه کې يې نه پټېدونکې هلې ځلې کړې دي. استاد یون د مخکني حکومت دویم لوړپوړی چارواکی دی چې خپلې سیاسي خاطرې خپروي. تر دې مخکې د ولسمشر کرزي د ولسمشرۍ د امنیت شورا سلاکار رنګین دادفر سپنتا هم خپلې خاطرې خپرې کړې او د لوستونکو له تاوده هرکلي سره مخ شوې دي.
د سياسي خاطراتو ليکل په افغانستان کې یوه نوې تجربه ده چې که له نړیوالو معیارونو سره برابرې ولیکل شي نو یو ښه دود، د سیاسي تاریخ سرچینه او د دولتي چارو د روڼتیا ښه لامل به وګرځي.
مینه وال کولای شي دا او د افغانستان اړوند خپاره شوي نور کتابونه له اکسوس کتابپلورنځي څخه ترلاسه کړي. د اکسوس کتابپلورنځي د کتاب رسونې څانګه کولای شي چې دا او ستاسو د خوښې وړ نور کتابونه په کابل کې يوازې د ۳۰ افغانيو په بدل کې ستاسو تر کور او کارځای پورې در ورسوي.

The Richest man in Babylon

چهارشنبه, 04 دلو 1396 03:59

The Richest man in Babylon یا د بابل شتمن نومی کتاب د امریکایي لیکوال جورج اېس کلاسن له خوا د مالي هوښ او ځان بسياینې په موخه لیکل شوی کتاب دی. د دغه کتاب انګرېزي بڼه ۱۴۴ مخونه لري او په ټوله کې د فردي مالي چارو د پیاوړتیا په موخه شپږ قوانین څرګندوي. نوموړی لیکوال د یادې موضوع په اړه خپل قوانین په داستاني بڼه بیانوي څو وکولای شي خپل دا قوانین په اغېزناک ډول پر لوستونکو پلي کړي.
نړیوالو سروې ګانو یاد کتاب د ځان بسياینې په برخه کې یوه ډېره لوستل شوې او معتبره سرچینه ګڼلې ده او همدارنګه د دغه کتاب په ستاینه کې مشهور لیکوال او د فردي بریالیتوب روزونکي برایان ټرېسي نوموړی کتاب د اقتصادي بریالیتوب لومړۍ خښته بللې، ځکه د ده په باور تګلارې یې خورا ساده، سیده او اغېزناکې دي. نامتو سوداګر او ویناوال جیم رون وایي، د دغه کتاب د لوستو سپارښتنه راته زما لارښود ایرل شوف وکړه، ما یې تګلارې عملي کړې او په ۳۲ کلنۍ کې میلیونر شوم. همدارنګه د کتاب کره کتونکي وایي چې یاد کتاب ډېر مخکې لیکل شوی خو لا یې هم تګلارې مهمې او د پلي کېدو وړ دي.
له نېکه مرغه دا کتاب زموږ په هېواد کې پښتو ژبې ته هم ژباړل شوی دی. «د بابل خان» پښتو بڼه ۱۸۲ مخونه لري، جبار فراز ژباړلی او سروش کتاب پلورنځي چاپ کړی دی. یاد کتاب په روان کال کې دوه ځله چاپ شوی دی او د لوستونکو له تاوده هرکلي سره مخ شوی دی. مینه وال کولای شي دواړه بڼې یې له اکسوس کتاب پلورنځي څخه په مناسبه بیه ترلاسه کړي.

پوتین د پانګې او واک کړکېچ

چهارشنبه, 27 جدی 1396 03:53

په دغه کتاب کې د روسیې پر سیاست او حکومت، د پوتین پر ژوندلیک، کارېزما، رهبرۍ، بهرنیو اړیکو، رسنیو او د شوروي اتحاد د پاشلتیا پر پیلامه او د نننۍ مقتدرې روسیې او په هغې کې د پوتین په رول جامع او هر اړخیز بحث شوی دی.
دا کتاب په ۲۰۱۴ کال کې د مصري ژورنالیست ډاکتر ساعي عماره له خوا په عربي ژبه لیکل شوی دی او پښتو ژبې ته د الجزیرې خبریال او ژباړن ښاغلي حمید محمدشاه را ژباړلی دی.
د کتاب پښتو بڼه ۳۱۰ مخونه، یوه سریزه او نهه څپرکي لري. د کتاب په لومړیو کې د شوروي اتحاد د وروستي زعیم میخایل ګورباچوف د تګلارو په اړه بحث شوی دی او دا لاملونه په ډاګه کوي چې شوروي اتحاد څنګه وپاشل شو او د دې پیلامه څه وه. له هغې وروسته چې کله سړه جګړه پای ته رسېږي، نننۍ روسیه را پورته کېږي، یلڅېن واک ته رسېږي او له هغې وروسته خپل ځایناستی ولادیمیر پوتین ټاکي؛ د کتاب لیکوال د دې ټاکنې دلایل بیانوي. تر دې موضوع وروسته د پوتین پر ژوند بحث شوی، هغه عناصر په ډاګه شوي چې د پوتین په شخصیت جوړونه کې یې مهم رول لوبولی دی. د ده کورنۍ، زده کړې، د تحصیلي پړاو پروني ملګري او ننني همکاران او د روسیې په سیاسي چارو کې د دوی رول ارزول شوی دی. همدارنګه د کتاب د مباحثو په اوږدو کې د روسیې د تاریخ، سیاست او حکومت په اړه مهم بحثونه شوي دي او دا په ډاګه شوې چې نننۍ روسیې ته کوم ملي او نړیوال ګواښونه متوجه دي او د پوتین تر مشرۍ لاندې حکومت له دې معادلاتو سره په کومو تکتیکونو برخورد کوي. د کتاب د لیکوال هڅه دا ده چې د روسیې په ژغورلو او بیا پیاوړي کولو کې د پوتین رول وارزوي او هم دا جوته کړي چې په روسیه کې سیاسي چارې څنګه مدیریت کېږي او سیمې او نورې نړۍ ته یې څه پایلې متوجه دي.
په دې توګه د سیاست مینه وال او د اسیایي چارو څېړونکي کولای شي له دغه کتاب څخه د یوې کره او تازه سرچینې په توګه کار واخلي. د یادونې وړ ده چې کتاب اکسوس کتاب پلورنځي چاپ کړی او پر اکسوس سربېره د کابل، کندهار، هرات، ننګرهار، خوست، مزار شریف او غزني ولایتونو په مشهورو کتاب پلورنځیو کې همدا نن د تر لاسه کېدو وړ دی.

Popular News

د سیاسي اسلام ماته کتاب د فرانسوي لیکوال اولیویه روه…
د ارګ ناویلې خبرې کتاب چاپ شو. یاد کتاب د…
د اېس ریاست کتاب د افغانستان او پاکستان په اړه…
د فروید ارواپوهنه کتاب د امریکایي پوهنتون ویسترن ریزرف د…

Fire and Fury inside the White House

چهارشنبه, 20 جدی 1396 02:35

د امریکا د ولسمشر ډونالډ ټرمپ په اړه د امریکایي لیکوال مایکل ولف مشهور سیاسي کتاب «اور او غوسه» تازه چاپ او بازار ته وړاندې شوی دی.
په انګریزي ژبه لیکل شوی دغه کتاب ۳۴۰ مخونه لري. په دې سیاسي کتاب کې چې ولسمشر ټرمپ يې په ځلونو د خپرېدو د مخنيوي هڅه کړې د نوموړي د شخصیت، رهبرۍ، مدیریت او ناسمو سیاستونو مهم اړخونه بیان شوي دي. لیکوال هڅه کړې چې په سپینه ماڼۍ کې روان وضعيت، د چارو د اجرا لارې، تفاهم او تقابل روښانه کړي. په ټوله کې دغه کتاب په ډاګه کوي چې څنګه او ولې سپینه ماڼۍ د یوه متنازع زعیم له خوا اداره کېږي.
ولسمشر ټرمپ د دغه کتاب په خپرېدو غوسه شوی او پکې شوي بحثونه يې درواغ بللي دي. د کتاب ليکوال بیا د ټرمپ د غوسې په غبرګون کې ان بي سي ټلوېزیون ته په طنزي انداز کې وویل: ز«ه له ټرمپ څخه مننه کوم چې د کتاب په پلورلو او د هغه د محتویاتو په تایید کې راسره همکاري کوي».
په کتاب کې د جنوبي اسیا د هېوادونو په ځانګړي ډول هند او پاکستان په تړاو د ټرمپ د سیاستونو په اړه څه نه دي ویل شوي خو د افغانستان د جګړې او مسئلې په اړه پکې یادونه شوې او دا په ډاګه کوي چې د دې اوږدې، مبهمې او مصرفي جګړې په اړه ولسمشر څومره بې خبره او بې پروا دی او کله یې چې خپله تګلاره اعلانوله نو عقل یې له لاسه ورکړ او د افغانستان د قضیې په اړه یې ګټوره پرېکړه ونه کړای شوه. همدارنګه ټرمپ د ستراتېژۍ د اعلان پر مهال ویلي وو چې چین د افغانستان له کانونو ګټه پورته کولی شي خو امریکا یې نه شي کولی او خپل حضور یې بې ګټې او د ناسمو پایلو شاهد وباله.
بلخوا کتاب د ټرمپ سیاستونه ناقص او د امریکا ملي ګټو ته زیان اړوونکي بولي.
د دغه کتاب تر خپرېدو وروسته د واشنګټن کتاب پلورنځي د خلکو د اوږدو کتارونو شاهد وو. هر امریکایي هڅه کوله چې په سپینه ماڼۍ کې د روانو چارو او په دې تړاو له نويو افشاګریو خبر شي. د امازون د شمېرو له مخې دغه کتاب په بېخي ډېر کم وخت کې زیات مشهور او وپلورل شو. د امریکا کتاب پلونځي څو ځله د دغه کتاب د چاپي بڼې له کمښت سره مخ شول، چې په پايله کې يې ليکوال د کتاب د سافټ بڼې خپرولو ته مجبور شو. امریکایان سیاسي کتابونه هغه هم تر ډېره د چارواکو خاطرې تر ډېره لیکي او د دوی د کلتور یوه ژوندۍ او دودیزه برخه ده.
لوستونکي کولای شي د دغه کتاب انګرېزي بڼه له اکسوس کتاب پلورنځي څخه په مناسبه بیه ترلاسه کړي.

د سیاسي اسلام ماته

یکشنبه, 19 قوس 1396 06:31

د سیاسي اسلام ماته کتاب د فرانسوي لیکوال اولیویه روه اثر دی چې د اسلامي غورځنګونو پر فعالیتونو یې منتقدانه بحث کړی دی. له دري ژبې څخه د یاد کتاب پښتو ژباړه د هېواد نومیالي ژورنالېست او ژباړن ښاغلي محمد زبیر شفیقي کړې ده. کتاب ۲۸۶ مخونه لري او تازه د اکسوس کتاب پلورنځي له خوا چاپ شوی دی. 
ټول کتاب په دیارلسو برخو وېشل شوی دی: په لومړۍ برخه کې مقدماتي او اېډیالوژیک بحث شوی دی له هغې وروسته په دويمه برخه کې د اسلام او سیاست تر عنوان لاندې جامع بحث شوی دی، په درېیمه برخه کې د اسلامېزم اېډیالوژۍ په اړه هر اړخیز بحث شوی دی، په څلورمه برخه کې د اسلامېزم ټولنپوهنه ارزول شوې ده، په پنځمه برخه کې د اسلامېزم د اېډیالوژۍ بحران څېړل شوی دی، په شپږمه برخه کې نوې بنسټپالنه تشرېح او تنقید شوې، په اوومه برخه کې د اسلامپالو جیوستراتېژۍ په اړه بحث شوی دی، په نهمه برخه کې د اسلامي اقتصاد په اړه پراخ بحث شوی دی، په لسمه برخه کې د افغانستان په جهاد او دودیزه ټولنه بحث شوی دی، په یوولسمه او دوولسمه برخه کې د ایران پر اسلامي اوښتون او شیعه یېزم بحث شوی دی او په دیارلسمه برخه کې د پایلې تر عنوان لاندې د یوې ناډاډمنې راتلونکې په اړه جامع بحث شوی دی. په ټوله کې د لیکوال هڅه دا ده چې دغه پوښتنې ته ځواب ومومي چې ایا اوسنی سیاسي اسلام به پر دې برلاسی شي چې اسلامي ټولنو ته بدیل وړاندې کړي که نه؟ د کتاب په بشپړ لوستلو سره به ځواب ومومی. د دې کتاب او اېډیالوژۍ پلویانو نیوکو ته په ځواب کې د اسلامي غورځنګونو یو سر لاری ښاغلی راشد الغنوشي وایي چې سیاسي اسلام د ماتې سره مخ نه دی بلکې د سمون، تیاري او بیا پیاوړي کېدو په حال کې دی. خو عیني واقعیتونو ته په کتو داسې څه نه لیدل کېږي چې اسلامېزم د نړیوال سیاست یو مطرح قطب معرفي کړي. د تمدنونو ټکر نومي کتاب لیکوال ساموئل هانتېګتون په اند په نني نړیوال نظم کې مسیحي تمدن په ټولو حوزو برلاسی دی او اسلامي تمدن د افراطیت په لومو کې ښکېل دی او دا ښکېلتیا کولای شي چې د نړۍ نظم ته ګواښونه پېښ کړي نوموړي هم پر اسلامېزم منتقدانه تمرکز کړی دی خو د اسلامي ټولنې د مطرح متفکرینو له اېډیالوژیکو غبرګونونو سره مخ شوی دی. 
په مجموع کې د دغه کتاب په لوستلو سره کولای شو چې د اسلامي غورځنګونو د ځوړتیا او نه پیاوړتیا لاملونه وپېژنو او دا لاره ومومو چې څنګه کېدای شي چې اسلامېزم د نړیوال نظم یوه مطرح برخه شي او د وضعي قوانینو په متورم بازار کې شریعت خپل حاکمیت وساتی شي.

څپې او وختونه

راسره ملګري شئ

د سپوږمۍ راډیو اپلیکشن

Spogmai App   Spogmai App