ژوند

Latest News

نورمال وزن د ماشوم د روغتیا نښه ده

سه‌شنبه, 26 جدی 1396 04:55

ژباړه: حمیدالله حمیدي


په ماشومانو کې د روغتیا تر تولو ښه نښه د هغوی نورمال وزن دی؛ چاغښت په ماشومانو کې له درې کلنۍ وروسته شروع کېږي چې د میندو او پلرونو اندېښنه هم له همدغه ځایه پیلېږي.
په ماشومانو کې د چاغښت د مخنیوي لپاره باید د هغوی په غذایي رژیم کې بدلون راوستل شي. په غذایي رژیم کې بدلون په دې مانا نه دی چې کمښت پکې را وستل شي.
ماشوم د خوراکي توکو له ترکیب څخه بې خبره وي، نو له همدې کبله د یوه منظم غذایي رژیم لپاره د هغوی مجبورول یو څه ستونزمنه خبره ده او بله دا چې ماشوم کولی شي په پټه هم له خپل غذایي رژیم څخه سرغړونه وکړي او ورځ تر بلې یې وزن زیات شي.
هره میاشت مو د خپل ماشوم وزن او قد سره پرتله کړئ او غذایي رژیم ته یې پاملرنه وکړئ. تر ټولو ښه خبره دا ده چې ماشوم د تغذیې د برخې متخصص ته ورولی څو ورته منظم غذایي مهالوېش جوړ کړي او په سم ډول یې عملي کړئ.
ماشوم باید په ورځني ډول له ټولو غذایي وعدو څخه برخمن شي. اجازه مه ورکوئ چې ماشوم د ټلوېزیون کتلو پر مهال خواړه وخوري.

ژوند د ګلونو د را ټوکېدو خاوره

سه‌شنبه, 26 جدی 1396 04:52

ژباړه: حمیدالله حمیدي


ژوند هغه خاوره ده چې ګلونه پکې را ټوکېږي. د ښه ژوند لپاره بیا مینه تر ټولو اړینه ده ځکه همدا مینه ده چې په وسیله یې ژوند په اسانۍ سره پر مخ تللی شي.
مینه په خپل ذات کې ډېره ارزښتناکه ده، مقصد او موخه نه لري، خو اغېزه یې دومره زیاته ده چې پر سړي باندې یوه ځانګړې خوښي راولي. دغه څه د مینې مقصد او موخه نه دي؛ ځکه مینه سوداګري نه ده چې ګټه او تاوان دې پکې وي. دا مه هېروئ که چېرې په ژوند کې موخه ولرو او له مهالوېش سره سم ژوند وکړو، لرې به نه وي چې په ډېرې اسانۍ له هغو ستونزو ځان وباسو چې ورسره مخ کېږو.
دا هم مه هېروئ چې زموږ ژوند په اوس پورې تړلی، اوس ژوند وکړئ او ژوند یو غنیمت وګڼئ. څه چې په ژوند کې ډېر اړین او مهم دي، هغه زموږ او ستاسو لیدلوری دی. څه ډول چې فکر کوئ، ژوند به مو په هماغه ډول مخې ته ځي؛ نو ښه دا ده چې تل مثبت فکر وکړو او ژوند ته په ښه سترګه وګورو.
ژوند یعنې په لوړو ختل او بېرته شا ته نه را ګرځېدل دي. هغه کسان چې پر دې پېچومو او لوړو مخ پورته ځي، نو ژوند به یې خوځنده او له خونده ډک وي.

د اولاد په روزنه کې د ميندو او پلرونو ونډه

سه‌شنبه, 26 جدی 1396 04:49

ژباړه: حمیدالله حمیدي


له ګڼو خلکو مې اورېدلي چې وایي، اولاد په زړه خوږ په خوله تریخ. خو زما په اند دا خبره په هېڅ ډول منطق برابره نه ده. مینه هغه ده چې اظهار شي. پټه مینه یوه اړخیزه پاتې کېږي او هېڅکله سړی کومې پایلې ته نه شي رسولی. که ميندې او پلرونو له خپلو اولادونو سره مینه ونه کړي، د دوی په ژوند به یې خپل اولادونه یتمان کړي وي. (د ژباړن خبرې)

کېدای شي په اوسنۍ ماډرنه نړۍ کې لا هم ډېر کسان په دې اند وي، چې د اولاد روزنه یوازې د مور پر غاړه ده او پلار مجبور دی چې کورني لګښتونه پر غاړه واخلي او پوره یې کړي. خو څېړنو ثابته کړې چې د اولادونو په روزنه کې د پلار ونډه داسې څه نه ده چې له پامه وغورځول شي. په دې مطلب کې د اولاد په روزنه کې د مور او پلار پر ونډې بحث کوو.
د اروا پوهانو د څېړنو له مخې، د اولاد روزلو درې بېلا بېلې لارې شتون لري چې په لاندې ډول دي:
۱- په لومړۍ ډله کې هغه میندې او پلرونه راځي، چې له خپلو ماشومانو سره په کمه اندازه مینه کوي، خو برعکس ډېر یې تر څار لاندې نیولي وي، ورځنۍ چارې یې څاري او تنبېه کوي یې.
۲- په دویمه ډله کې هغه والدین راځي، چې په دواړو برخو کې یې توازن ساتلی وي، مانا دا چې هم د خپلو اولادونو ورځنۍ چاري څاري، هم مینه ورکوي او زړونه یې ساتي.
۳- په درېیمه ډله کې بیا هغه میندې او پلرونه راځي، چې تر ډېره یې خپل ماشومان نازولي اموخته کړي وي، ورځنۍ چارې یې نه څاري، روزنې ته یې پاملرنه نه کوي، خو برعکس یې په مینه کې دومره افراط کړی وي چې له سره یې پر اولادونو خبره اثر نه کوي، چې دغه ډول کړنې د ماشوم راتلونکې له ګواښ سره مخ کولی شي.
څه ډول، چې ټولو ته جوته ده، پلار او مور دواړه د اولاد په سالمه روزنه کې مهم رول لري. میندې تر ډېره د خپل ماشوم د خوراک او څښاک په برخه کې بوختې وي، خو پلار بیا خپلې کورنۍ ته په روزۍ پیدا کولو بوخت وي او کله چې کور ته ځي خپل ډېر وخت له اولادونو سره ساعتېرۍ او لوبو ته ورکوي. څېړنو ثابته کړې ده، چې ماشوم ډېر پر دې خوشاله وي، چې له خپلو پلرونو سره لوبې وکړي او هاخوا دېخوا ورسره وګرځي، خو کله چې خپه او غمګین وي، نو بیا خپلې مور ته پناه وروړي. په دې وروستیو کې یوې څېړنې په ګوته کړې ده چې ۹۵ سلنه ځوانان هغه که نارینه وي او یا هم ښځینه، تر ډېره هڅه کوي چې د خپلو بریالیو همزولو په څېر وي، خو که له هغوی وپوښتل شي چې غواړي په راتلونکې کې څه وي، خپل مور او پلار یې د ځان لپاره الګو یا مخ بېلګه ټاکلي وي چې دغه څه د اولاد او والدینو تر منځ نه جلا کېدونکې اړیکه په ګوته کوي.
پلار څه ډول کولی شي د خپلو اولادونو پام ځان ته واړوي؟
پلار ته پکار ده، چې له زوی او لور سره د مینې توپیر ونه کړي. څه چې د خپل زوی لپاره خوښوي، لور ته یې هم باید خوښ کړي. په کومه کچه چې له زوی سره مینه کوي، لور ته یې هم باید هغه ډول مینه ورکړي. زموږ په سنتي ټولنه کې هغه اولادونه چې له ۱۶ کلنۍ پورته شي، تر ډېره یې د راز او نیاز کس خپله مور وي. دوی په پوره ډاډ او زړورتیا سره خپل رازونه له مور سره شریکوي او دوی له خپلو میندو سره پر هغه څه خبرې کوي، چې له پلار سره یې نه شي کولی. خو که له اولادونو سره څه ډول چې لازمه ده هسې چلند وشي او له ماشومتوب څخه تر ځوانۍ پورې ور سره یو ډول مینه وشي، کېدای شي مور او پلار دواړه اولاد ته د یوه نږدې ملګري په څېر اوسي او راز و نیاز ور سره وکړي.
کله چې اولادونه له خپل پلار سره د مینې د اظهارولو لپاره په کوم کار لاس پورې کوي، پلار اړ دی چې مناسب ځواب ورته ولري، تر څو یې د خپل اولاد زړه لاس ته راوړی وي. د کلماتو رول هم ډېر مهم دی. ځینې پلرونه نه غواړي خپله مینه او احساسات له خپل اولاد په تېره له زامنو سره شریک کړي چې دا خپله د زوی او پلار تر منځ کرکې ته لمن وهي او د وخت په تېرېدو سره زیاتوالی مومي.
کله، چې اولادونه لویېږي، بیا نو په اسانۍ سره نه شي کولی خپله مینه پلار ته ښکاره کړي، خو کولی شي له اوسنیو امکاناتو ګټه واخلي، د بېلګې په توګه خپل پلار ته د ایمېل له لارې داسې یوه سندره واستوي چې پکې د پلار ستاینه شوې وي او په یو ډول خپله مینه ورته ثابته کړي. په دغه واړه څېز هم ستاسو پلرونه له کچې زیات خوشالېږي. کېدای شي تاسو ته دغه څه ارزښت ونه لري، خو پلرونو ته ډېر ارزښت لري.
د مېړه او مېرمنې اړیکه او پر اولادونو یې اغېز:
څومره چې د مېړه او خاوند تر منځ اړیکه سمه وي، په هماغه کچه پر اولادونو هم مثبت اغېز کوي او روښانه راتلونکې به ولري. دا سمه ده چې د مېړه او مېرمنې تر منځ کله ناکله لفظي شخړې او د نظر اختلاف پیدا کېږي، خو دا بیا د دوی تر پوهې پورې اړه لري چې څه ډول د خپلو اولادونو په مخ کې ادب مراعات کړي. همدا ده چې اولادونه زده کوي چې څه ډول په راتلونکې کې په مخ کې پرتې ستونزې حل کړي او له ورځنیو چارو سره جوړ جاړی وکړي.
دغه ډول څومره چې د خاوند او مېرمنې تر منځ اړیکې خرابې وي په هماغه کچه پر اولادونو منفي اغېز کوي او راتلونکې یې روښانه نه لیدل کېږي. د پلار عمر هم له اولادونو سره د مینې، لوبو او روزنې په برخه کې توپیر کوي. تر ډېره هغه پلرونه چې لا یې د ځوانۍ باغ تازه وي، خپلو اولادونو ته رسېدلی شي او مینه ور سره کوي، ورځنۍ چارې یې څاري او له خپلو اولادونو څخه وخت پر وخت ځان خبروي، خو کله چې د پلار عمر پخېږي او د اولادونو شمېر یې زیاتېږي، بیا یې دومره د زړه زور نه وي. اولادونه هم تر ډېره په دې وخت کې زړه نه ښه کوي چې پلار یې د ځوانۍ چمونه ورته وکړي.

دغه خواړه د ځيګر غوړ له منځه وړي

دوشنبه, 25 جدی 1396 04:05

ژباړه: حمیدالله حمیدي
نن سبا ډېر خلک د ځیګر د غوړو پر ناروغۍ اخته دي. د دې ناروغۍ نښې دا دي چې ناروغ د ستړیا احساس کوي، وزن یې ورځ تر بلې کمېږي او جسمي ځواک له لاسه ورکوي. له بده مرغه پر دې ناروغۍ ډېری د لوړ عمر خاوندان اخته کېږي. دا چې څه ډول کولی شو له دې ناروغۍ ځان وژغورو، په دې لیکنه کې مو ورته اشاره کړې ده:
۱- د ليمو شربت وڅښئ: هر سهار په اوبو کې لیمو واچوئ او ویې څښئ، تروش لیمو د ځیګر د غوړو لپاره ګټور دي او روغتیا تضمینوي.
۲- په پخلي کې له زنجبیل استفاده وکړئ: هغوی چې په پخلي کې له زنجبیل څخه ګټه اخلي، د ځیګر له ناروغۍ په امن کې دي.
۳- شین چای وڅښئ: د شین چای څښل په ځیګر کې د غوړو د غوټه کېدو مخه نیسي او په ټوله کې د دې ناروغۍ درملنه کوي. د چین خلک په دې اند دي چې شین چای د ځیګر د سرطان مخه هم نیسي.
۴- له نباتي پروټينو استفاده وکړئ: روغتیا پالان د هغو کسانو لپاره د سويا او نباتي پروټينو سپارښتنه کوي چې د ځیګر پر ناروغۍ اخته وي. نباتي پروټین د حیواني پروتینو په پرتله ګټور دي او د ځیګر ناروغۍ لپاره ښه نسخه کېدای شي.

Popular News

ژباړه: حمیدالله حمیدينن سبا ډېر خلک د ځیګر د غوړو…
ژباړه: حمیدالله حمیديدا سمه ده چې ورزش کول روغتیا ته…
که غواړی چې سالم مغز ولری نو مېوې او سبزۍ…
۱- د لوړې کالورۍ لرونکی غذایي رژیمڅېړنو ښودلې چې غوړ،…

د پلي ګرځېدو ګټې

دوشنبه, 25 جدی 1396 04:04

ژباړه: حمیدالله حمیدي
دا سمه ده چې ورزش کول روغتیا ته ګټه لري، خو خلک دومره بوخت دي چې په منظم ډول ورزش کولو ته وخت نه مومي. د همدې لپاره غوره لاره دا ده چې پلی مزل وشي.
پلی مزل ساده او اسانه فعالیت دی خو روغتيا ته ډېره ګټه لري او د ګڼو ناروغيو مخه نيسي.
که مو له کاره زړه تنګېږي، نو د څو دقیقو لپاره پلی مزل وکړئ. که هره ورځ ۱۵ دقيقې پلی تګ وشي، نو منفي احساسات وجود ته لاره نه شي موندلی. د پلي ګرځېدو پر مهال انسانان د ستونزو پر هواري فکر کوي او غوره حللارې مومي.
د پلي تګ پر مهال د انسان ذهن په استراحت پیل کوي او دغه راز د دې سبب کيږي چې د کارونو د ترسره کولو لپاره نوې او اسانه لارې وموندل شي. د پلي تګ بله ښېګڼه دا ده چې د ګرځېدو پر مهال بهر له بېلابېلو خلکو سره مخ کېږی، له هغوی سره پېژنی او ښايي داسې څوک ومومی چې يوه ورځ مو لويه ستونزه در هواره کړي. مطلب دا چې د پلي ګرځېدو پر مهال ښايي داسې څوک وپېژنی چې د موخو او یا کاروبار له اړخه ور سره ډېر نږدېوالی ولری، همدا د موخو او کاروبار نږدېوالی ښايي دواړو ته ګټه وکړي.

زرغون رنګه خواړه او پر روغتیا یې اغېزې

یکشنبه, 24 جدی 1396 04:04

ژباړه: حمیدالله حمیدي
که مو په پخلنځي کې زرغون رنګه مېوې او سابه موجود وي نو پر خوښۍ سربېره مو روغتیا ته هم ګټه رسوي. دلته د هرې زرغون رنګه مېوې يا سبزۍ پر روغتيايي ګټو جلا جلا بحث کوو:
کېوي
د کېوي تر ټولو ښه ځانګړنه دا ده چې په زیاته کچه ويټامین سي لري. د تغذیې د برخې متخصصین وایي، که غواړی چې د بدن ويټامین سي مو پوره وي او له یخنۍ وژغورل شی، نو په خپل غذایي رژیم کې مو هرو مرو کېوي ته ځای ورکړئ.
که څه هم چې کېوي د انرژۍ د ډېر توليد وړتيا نه لري، خو د (بي) ګروپ ويټامینو، ويټامین (ډي) او (اې) په لرلو سربېره معدني مواد لکه پوتاشیم، کلسیم، فاسفورس، مس او مګنېزیم هم لري.
انګور
انګور کولی شي چې له ګڼو ناروغیو مو وژغوري. انګور د ويټامین اې، سي او بي-۶ تر ټولو ښه سرچینه بلل کېږي چې په زیاته کچه پوتاشیم، کلسيم، اوسپنه، فاسفورس، مګنېزیم او سلينیم هم لري. انګور د ځوانۍ د اکسیر په نوم یادېږي. انګور زړه روغ ساتي او د وینې فشار تنظیموي، د انګورو په پوست کې شته انټي اکسیدان د دې مېوې ارزښت دوه برابره کوي.
د انګورو خوړل مو له سرطان څخه ژغوري، قبضیت له منځه وړي او د کم خونۍ مخه نیسي.
دولمه مرچ
دولمه مرچ حافظه پیاوړې کوي.
که فکر کوی چې حافظه مو کمزورې شوې او تمرکز مو را ټیټ شوی، نو دولمه مرچ یې تر ټولو ښه نسخه ده. په دولمه مرچو کې شته مګنېزیم د حافظې د پیاوړتیا لامل کېږي. دولمه مرچ د هغو سبو په ډله کې راځي چې له سلاد سره ګډېږي او خام خوړل کېږي. دغه سابه د انرژۍ د توليد وړتيا او په خپل ترکيب کې هېڅ راز غوړ نه لري.
کاهو
کاهو وزن کموي.
کاهو د هغو سبو په ډله کې راځي چې په زیاته کچه فیبر لري او د چاغو کسانو لپاره یې ښېګڼه دا ده چې وزن کموي. د تغذیې متخصصین یې د هغو کسانو لپاره ډېر توصیه کوي چې غواړي غذایي رژیم ونیسي او وزن یې کم شي. کاهو د کمې کالورۍ لرونکو سبو په ډله کې راځي چې د وزن له کمېدو سره مرسته کوي.
زیتون
د امریکا د زړه ټولنه وایي، په ورځني ډول د څلورو زیتونو خوړل د زړه د سلامتیا لامل کېږي. دغه اندازه زیتون یو نیم ګرام غیر مشبوع غوړ لري چې په وینه کې د کولېسټرولو د تنظیم سبب ګرځي. زیتون مدیترانه یي خواړه بلل کېږي؛ ځکه د نړۍ په کچه تر ټولو ډېر زیتون په همدې سیمه کې کرل کېږي.
بادرنګ
بادرنګ په خپل ترکیب کې ۹۵ سلنه اوبه لري.
که مو د بادرنګ له خوړلو سره نه وي جوړه، کولی شی د پوستکي د ښکلا لپاره یې وکاروئ؛ بادرنګ کولی شي د پوستکي التهاب له منځه یوسي او ښکلی یې کړي. د دې لپاره چې ښکلې څېره ولری، نو د بادرنګ له ماسک څخه ګټه واخلئ.
دڼیا (ګشنیز)
روغتیايي متخصصان وايي، ګشنیز اورۍ سالمې ساتي او د غاښونو د خرابېدو په مخنیوي کې هم ګټور دي.
د یوناني طب له مخې، ګشنیز په طبي بوټو کې حسابيږي، وچ او سوړ طبیعت لري .
دغه راز ګشنیز معده هم پیاوړې کوي او له خوړو سره د هغه کارول د هضم په پروسه کې اسانتیا راولي. د میندو د شیدو د زیاتېدا لامل ګرځي او د غاښونو د درد ارامولو لپاره د ګشنیز د دانو ژوول ګټه لري .
پر دې سربېره ګشنیز اشتها راوړونکي هم دي.
ګشنیز د خولې بد بوی لرې کوي او ډاکتران توصیه کوي چې د هوږې او پیازو له خوړو وروسته که په مناسبه اندازه ګشنیز وخوړل شي د خولې بوی ورکيږي.
پالک
پاخه شوي پالک تر ټولو ښه، قوي او مغذي خواړه دي؛ که څه هم چې پالک د کمې کالورۍ لرونکي خواړه بلل کېږي، خو د معدني موادو او ويټامینونو تر ټولو بډایه سرچینه هم په ګوته شوې ده. که په خپل غذایي رژیم کې پالک ولری، نو له چاغوالي مه وېرېږئ، که د بډوډو شګې نه لری کولی شی په اونۍ کې ان درې ځلې هم پالک وخوری.
که مو کله اعصاب خرابېږي او یا مو په کورنۍ کې څوک دغه ستونزه لري، د پالکو خوړل دې نه هېروي؛ د پالکو خوړل اعصاب اراموي او ذهني توازن پیاوړی کوي.
پالک هډوکي پیاوړي کوي.
دا چې پالک په خپل ترکیب کې په زیاته کچه کلسيم او ويټامین (کا) لري، نو د هډوکو د پیاوړتیا او بیا رغولو لپاره ګټور ثابتېږي. هغه کسان چې اوس او یا مخکې یې کوم هډوکی مات شوی وي، په رغېدو کې يې د پالکو خوړل تر بل هر څه ورسره ښه مرسته کولی شي.
معمولا،ً کله چې د انسان عمر زیاتېږي د بدن غړي یې هم ورسره ضعیفېږي چې له دې جملې یو یې سترګې دي، خو په پالکو کې شته (کارتنويدونه) هغه مواد دي چې سترګې ځوانې ساتي، کسي یې پر خپل حال پاتې کېږي او د سترګو له دید سره مرسته کوي.
د پالکو د پخولو تر ټولو بده لار د پالک زیات اېشول، خو تر ټولو ښه لاره یې په کمو غوړیو کې سره کول دي؛ ځکه که پالک د ډېر وخت لپاره و اېشول شي پکې شته ټول مواد یې له منځه ځي، بیا نو یوه شنه ګیاه وي او بس.
دا چې پالک نورو خوراکونو ته رنګ ورکوي نو په صنعت کې د رنګونو د تولید لپاره هم ترې کار اخیستل کېږي.
پالک په خپل ترکیب کې د (اګزالات) په نوم کیمیایي ماده لري چې د بدن لپاره ګټوره ده، خو زیاته پیمانه یې په بډوډو او مثانه کې د ډبرې جوړېدو لامل ګرځي.
نو د هغو کسانو لپاره چې بډوډي یې ډبرې تولیدوي، ډېر نه توصيه کېږي.
روغتیاپالان په دې اند دي چې پالک د وچې ټوخلې لپاره تر ټولو ښه نسخه ده. دوی وایي، پالک د سرطان ضد خاصیت لري او د وینې د سرو کورویاتو له تولید سره مرسته کوي.
پالک د پروستات، رحم، معدې او حنجرې سرطان له منځه وړي او په وینه کې د کولېسټرولو تنظیمول یې اصلي دنده ده.

نوښت څه ډول خوځښت پیدا کوي؟

چهارشنبه, 20 جدی 1396 02:42

ژباړه: حمیدالله حمیدي
نوښتګر ذهن د متمرکزو پوښتنو په مطرح کېدو سره فعالیت پیلوي. دغه پوښتنې چې څومره ډېرې او غوره وي، په هماغې کچه مو تفکر هم پیاوړی کيږي. د بااستعداده خلکو یوه ځانګړنه دا ده، کله چې پوښتنې کوي، پوښتنې یې ژورې او دقیقې وي. کله چې پر دې وتوانېدی چې له ځان څخه معقولې، دقیقې او ژورې پوښتنې وکړی، نو له بل چا څخه هم دغه ډول پوښتنې درته اسانه کيږي.
غواړی څه وکړی؟
دا یوه له هغو پوښتنو ده چې ډېر کله یې خلک په سوداګرۍ او ورځني ژوند کې مطرح کوي. ډېری خلک داسې دي چې له خپل وخت څخه سمه ګټه نه اخلي او بې ځایه یې تېروي.
لیکوال بنجامین ترګو وایي: «له وخت څخه تر ټولو بده ګټه اخیستنه دا ده چې تاسو یو کار په سم ډول ترسره کړی، په داسې حال کې چې د هغه کار لپاره هېڅ اړتیا نه وي. ډېری کسان پر سختو کارونو بوخت وي او په خپل کار کې له پوره زحمت څخه کار اخلي، خو یوه څه ته یې پام نه وي، کوم کار چې دوی ترسره کوي، ورته اړتیا نه وي او له موخو سره یې هم هېڅ تړاو نه لري.

پر زړه او مغز د مالګې اغېزې

چهارشنبه, 20 جدی 1396 02:37

ژباړه: حمیدالله حمیدي

مالګه تر بل هر څه ډېر د زړه او مغز روغتيا ګواښي. زموږ بدن په ورځني ډول یو یا دوه ګرامه مالګې ته اړتیا لري، په داسې حال کې چې ډېری خلک لږ تر لږه له اتو تر لسو ګرامو مالګه خوري. پر دې سربېره اویا سلنه هغه خواړه چې موږ یې د ورځې په اوږدو کې خورو، مالګه لري. مالګه د غذایي موادو اوبه ډېروي او په پایله کې د چاغوالي لامل کيږي. که د مالګې خوراک له ۲۵ تر ۳۰ سلنې پورې را کم کړی، نو له روغتيا سره مو مرسته کوي. مالګه اشتها ډېروي نو هغه کسان چې غواړي وزن یې کم شي او غذایي رژیم یې نیولی وي، د مالګې خوړل دې کم کړي. په پایله کې که غواړی چې مناسب اندام ولری، مالګه کمه وخورئ. دغه راز نړیوال روغتیایي سازمان وایي، په ورځني ډول ټول لوی وګړي پنځه ګرامه مالګه خوري، که په دوامداره توګه دغه دول مالګه وخوړل شي ۲۳ سلنه د مغز د سکتې لامل کېدای شي او ۱۷ سلنه د دې امکان شته، چې یاد کس د زړه له حملې سره هم مخ شي. وروستيو څېړنو دا هم ثابته کړې چې له کچې زیاتې مالګې کارولو زيان تر سګرېټو څکولو هم ډېر دی.

 

څپې او وختونه

راسره ملګري شئ

د سپوږمۍ راډیو اپلیکشن

Spogmai App   Spogmai App