ژوند

Latest News

ګازرې د بدن دفاعي ځواک پیاوړی کوي

سه‌شنبه, 01 حوت 1396 04:09

د هوا ککړتیا په لویو ښارونو کې د خلکو ژوند ستونزمن کړی دی؛ تر ډېره هغه کسان چې په ککړه هوا کې په ښار او بازار کې ګرځي، په دې لټه کې هم وي چې څنګه وکولی شي د هغو ناروغیو مخه ونیسي چې د ککړې هوا له کبله پیدا کېږي.
د هاروارډ پوهنتون د څېړونکو په نوې څېړنه کې دا ثابته شوې ده چې ګازرې د سرطان ناروغۍ مخنیوی کوي. دغه څېړونکي وایي چې په ګازرو کې په زیاته اندازه د بتاکروتین شتون چې یو ډول انټي اکسیدان دي، مرسته کوي چې په بدن کې تخریب شوي سلولونه بیا ورغېږي.
هغه کسان چې په خپل غذایي رژيم کې يې ګازرو ته هم ځای ورکړی، د هغو کسانو په پرتله چې دا کار نه کوي، د ککړې هوا په مقابل کې لوړ مقاومت لري. د بدن همدغه مقاومت یې د دې لامل ګرځي چې د سرطان پر ناروغۍ اخته نه شي.

وړې خوښۍ، غنيمت وګڼئ

سه‌شنبه, 01 حوت 1396 04:07

د انسان ذهن او فکر ماشوم ته ورته وي، که مو ښه چلند ورسره وکړ تل به ارامه یاست. له ذهنه مو پخواني منفي فکرونه لرې کړئ او پر ځای یې مثبتو فکرونو ته ځای ورکړئ. له ځان سره ووایاست: د ژوند ټول بدلونونه مې اسانه، جذاب او په زړه پورې دي. سالم انسان هېڅکله هم د ستړیا احساس نه کوي، ښه اشتها لري، په اسانۍ سره یې خوب وړي او په همدې ډول بيدارېږي. هغه په فکر او عمل کې پوره دقت کوي، رښتينی وي؛ ځکه رښتینولي هم انسان ته ذهني ارمتیا ورکوي. هغه لارې چارې او چلونه زده کړئ چې کولای شی په ډېرو وړو څيزونو هم خپل ژوند په خوښۍ سره تېر کړی. که غواړی د نورو خلکو خبرې واوری، نو هڅه وکړئ له داسې کسانو سره ناسته ولاړه وکړی او خبرو ته یې غوږ ونیسی چې تل مثبتې خبرې کوي. له هغو کسانو سره چې تل ناهيلي وي او منفي خبرې کوي، ناسته ولاړه مه کوئ. هڅه وکړئ دوی هم له ځان سره جوړ کړی څو یوه بله ښېګڼه مو هم کړې وي.

رومي بانجان او پر بدن یې اغېزې

دوشنبه, 30 دلو 1396 03:48

څېړنو ثابته کړې چې د رومي بانجانو دانې کولی شي د یوه طبیعي درمل په توګه د اسپرینو په څېر ګټورې تمامې شي. څېړونکو د رومي بانجانو په دانو کې داسې مواد کشف کړي چې د وینې د لخته کېدو مخنیوی کوي، په بدن کې د وینې له جریان سره مرسته کوي او د اسپرینو په څېر کار ورکوي.
همدا اوس ګڼ شمېر کسان د نړۍ په ګوټ ګوټ کې اسپرین کاروي، څو د وینې له لخته یا ټینګېدو یې مخینوی کړی وي، په داسې حال کې چې اسپرین له خپلې ښېګڼې سره سره ځینې جانبي عوارض هم لري او په معده کې د وینې بهېدنې لامل کېږي.
روغتیاپالان وایي، د سرو بانجانو د دانو له خوړلو درې ساعته وروسته په بدن کې د وینې جریان خپل نورمال حالت ته راځي او دغه چاره تر ۱۸ ساعتونو پورې دوام کوي.
یوه څه ته مو باید پام وي چې د سرو بانجانو د دانو په کارولو سره په خپل سر د اسپرینو کارول پرې نه ږدئ، بلکې له خپل معالج ډاکټر سره هرو مرو مشوره وکړئ.

د مثبت بدلون پر لور

دوشنبه, 30 دلو 1396 03:47

په ارواپوهنه کې قانون دی چې وایي: «په ذهن کې مو د هغه څه تصویر جوړ کړئ چې غواړی یې، تصویر د ډېر وخت لپاره درسره په ذهن کې وساتئ او بیا بیا یې سترګو ته ودروئ، په پای کې به هغه څه ترلاسه کړی چې غواړی يې». که د دندې بدلول درته نا ممکن وي او له خپلې دندې سره مو مینه نه لری، یوازېنۍ د حل لاره یې دا ده چې هره ورځ هڅه وکړی له خپلې دندې سره مینه وکړی.
که ستونزه لری، هغه یوازې ستاسو د اندونو زېږنده ده. د دې لپاره چې له دې ستونزې خلاص شی خپل فکرونه بدل کړئ.
هېڅکله هم په دې اړه فکر مه کوئ چې ګواکې فلانی شی نه لری، بلکې د هغه څه د لاسته راوړلو لارې چارې ولټوئ، چې غواړی ويې لری.
د دغه کال هره ورځ کېدای شي ستاسو د ژوند تر ټولو ښه ورځ وي، خو په دې شرط چې د منفي فکرونو پر ځای په خپل ذهن کې مثبتو هغو ته ځای ورکړی، دا ډېر اسانه کار دی او تر ټولو ښه ګام دی چې په پورته کولو سره یې کولای شی خپل ژوند ته پر مثبت لوري بدلون ورکړی.

Popular News

ځینې ساده لارې چارې او سپارښتنې شته چې کولای شي…
ژباړه: حمیدالله حمیدينن سبا ډېر خلک د ځیګر د غوړو…
ژباړه: حمیدالله حمیديدا سمه ده چې ورزش کول روغتیا ته…
۱- د لوړې کالورۍ لرونکی غذایي رژیمڅېړنو ښودلې چې غوړ،…

د زړه ناروغۍ پنځه نښې چې بايد جدي وګڼل شي

یکشنبه, 29 دلو 1396 03:59

ژباړه: احمد الهام-


په امریکا کې د زړه ناروغۍ د وقايې مرکز وایي، د زړه ناروغۍ د ښځو د مړینې اصلي لامل دی. دغه مرکز وایي، په هرو څلورو مړې کېدونکو ښځو کې د يوې د مړينې لامل د زړه ناروغي وي. دغه محاسبه د نارینه و لپاره هم صدق کوي او د نارینه و په مړینه کې هم د زړه ناروغي له پامه نه شي غورځول کېدای. د امريکا د زړه ناروغۍ د وقايې مرکز وايي، په ټوله نړۍ کې یوازې ۵۴ سلنه ښځې دې پېښې ته متوجه شوې دي.
د زړه د ناروغیو په اړه وړاندوینه او له دې ناروغۍ څخه ځان ژغورل ډېره جدي مسئله ده چې باید پام ورته وشي. په دې لیکنه کې د زړه د ناروغیو له هغه نښو نښانو سره اشنا کېږی چې د ښځو د مړینې لامل کېږي.
ایا تر اوسه مو په دې اړه فکر کړی چې د زړه ناروغۍ څه ډول ناروغۍ دي. د زړه ناروغۍ ټولو هغه ناروغیو ته ویل کېږي چې په زړه پورې اړوندې وي، نه یوازې د زړه په سکتې پورې.
د نیویارک په هیل لنوکس روغتون کې د ښځو د زړه د سلامتیا د موسسې ريیس او د نړیوالې تغذیې د ټولنې بنسټ اېښودونکی ډاکټر سوزان شتاینباوم وایي، د زړه ناروغۍ په ټوله کې د رګونو د تنګوالي له کبله منځ ته راځي، خو دا چې زړه له څلورو برخو جوړ شوی، نو ناروغۍ یې هم په بېل بېل ډول د هرې برخې اړوندې کېدای شي.
کېدای شي زړه له ډول ډول پېښو سره مخ شي، خو تر هغه وخته پورې چې پر ښځو د زړه حمله را نه شي، کېدای شي د زړه ناروغیو ته یې پام نه شي. ځکه ډېرې ښځې لا هم پر دې نه پوهېږي چې د زړه ناروغۍ څه ډول نښې نښانې لري. که تاسو هم په دې ډله کې راځی، نو ښه ده چې پوه شی کومې نښې نښانې دي چې د زړه پر ناروغیو دلالت کوي.
۱- ساه لنډي
په ښځو کې ساه لنډي د زړه د ناروغۍ نښه ده. ځینې وخت ساه لنډي په تنفسي سيسټم کې د ستونزې له کبله وي، چې د حل لپاره یې باید ورزش وشي او که د هوا د یخوالي له کبله وي، باید د الرژۍ ټابلېټ وخوړل شي، خو که داسې نه وي بیا د زړه د ناروغۍ نښه کېدای شي. ډاکټر سوزان شتاینباوم وایي، د زړه اصلي دنده د وینې په وسیله د اکسېجن رسول دي، خو که ونه شي کولی په سم ډول اکسېجن ورسوي په دې مانا ده چې زړه له ستونزې سره مخ شوی دی. د زړه د ناروغۍ پر مهال تنفسي ستونزې دومره ډېرېږي، چې ان سړی نه شي کولی وغځېږي. د زړه ناروغي د بدن غړو ته د اکسېجن رسېدل ستونزمنوي. که تاسو هم په ساه اخیستو کې ستونزه لرئ او دغه ستونزه مو د الرژۍ له کبله نه وي، ښه ده چې له اړوند ډاکټر سره سلا وکړئ.
۲- د سینې په قفس کې د دروندوالي احساس
د سینې په قفس کې دروندوالی، چې د انژین په نوم هم یادېږي او ورسره ساه لنډي، د زړه د ناروغۍ اصلي نښې بلل کېږي. ډېری ښځې داسې احساس کوي چې پر سینه یې دروند شی اېښودل شوي او یا یې په معده کې شته خواړه هضم شوي نه دي. که له دې ډول پېښې سره مخ شوی او ښه پوه وی چې لامل یې بل څه نه شي کېدای، نو ژر تر ژره ډاکټر ته مراجعه وکړئ.
۳- د بدن په غړو کې ناڅاپي دردونه
په ښځو کې د نس درد، د زړه د ناروغۍ لامل کېدای شي. ډاکټر سوزان شتاینباوم وایي، ډېری هغه ښځې چې د زړه پر ناروغۍ اخته وي، د سینې په قفس کې نه، بلکې په نس کې درد احساسوي. همدا راز د زړه پر ناروغۍ اخته ښځې ډېر کله په ژامو او غاړه کې هم دردونه احساسوي. که مېرمنې پوهې شي چې د نس درد یې د میاشتنۍ ناروغۍ او یا هم په کولمو کې نه دی او ناڅاپي ورته پیدا شوی، هرو مرو دې ډاکټر ته د معاينې لپاره ورشي.
۴- د لاسونو او پښو ویده کېدل
د لاسونو او پښو وېده کېدل، کرختېدل، یخېدل او ور سره درد، د دې نښه ده چې د بدن دې برخې ته په سم ډول اکسېجن نه رسېږي. د وخت په تېرېدو سره، دې برخو ته د اکسېجن نه رسېدل اعصابو ته زیان رسوي. په اصل کې په لاسونو او پښو کې چې تاسو هر ډول حس لرئ، د اعصابو له سلامتیا سره اړیکه لري. که پوه شی چې د لاسونو او پښو کرختي مو کومه بله توجیه نه لري، نو پوه شی چې ستونزه مو په زړه کې ده.
۵- د زړه ټکان
ایا تر اوسه مو زړه لړزه او یا هم ټکان کړی؟ که یې ناڅاپه ټکان کړی وي مانا یې دا ده چې یا وېرېدلي یی او یا مو هم زړه په ضربان کې له ستونزې سره مخ شوی. دغه څه په ډېرې اسانۍ سره حس کېدای شي. داکټر سوزان شتاینباوم وایي، ډېری مراجعین يې وایي، له خوب وروسته له دغه ډول پېښې سره مخ کېږي او ډېر دوام هم نه کوي. دغه پېښې د کافین د زیاتو کارولو، په بدن کې د اوبو د کمښت او یا هم سټرېس له کبله وي. خو که دغه څه له دريو دقیقو ډېر دوام وکړي او پاس ذکر شوي شیان یې هم لامل نه وي، نو ښه ده چې له ډاکټر سره مشوره وشي.

څه وکړو چې زکام نه شو؟

چهارشنبه, 25 دلو 1396 09:01

ځینې ساده لارې چارې او سپارښتنې شته چې کولای شي په سړو کې مو له زکام څخه وژغوري. په څادر یا پړوني سره د خولې او پزې پټول کولای شي چې ستاسو تنفسي جهاز ته د یخې هوا د ننوتو مخه ونیسي. دغه راز هڅه وکړئ چې لاس او غوږونه مو د یخنۍ پر مهال پټ وساتئ.
د بدن ځینې برخې په ډېرې اسانۍ سره یخېږي او دفاعي سیستم نه شي کولی چې په هغه برخه کې د مېکروبونو او ویروسونو مخه ونیسي. د ورځې لږ تر لږه یو نیم لېتر پاکې اوبه وڅښئ؛ ځکه د مخاطي هیدراتاسیون لپاره ګټورې دي.
که غواړی چې په زکام اخته نه شی او له دې ناروغۍ څخه په امن کې اوسی، ګرمې شیدې او د بوټو چای په یخو ورځو او شپو کې ضرور وڅښئ.
هغه څښاک چې په خپل ترکیب کې ويټامین سي لري له زکام څخه د مخنیوي لپاره ګټور دی. لږ تر لږه په ورځ کې دوه ځله باید د کوټې هوا بدله شي، ان که بيرون هوا هر څومره یخه هم وي.
لږ تر لږه په ورځ کې درې ځله خپل لاسونه په ګرمو اوبو او صابون باندې ومینځئ او یا د مېکروب ضد درمل وکاروئ.

که خوښ اوسېدل غواړئ!

چهارشنبه, 25 دلو 1396 08:58

ډېر واړه کارونه شته چې په ترسره کولو سره یې ستاسو په ژوند کې بدلون راځي او خوښۍ در په برخه کوي. شتمني خوښي نه شي درکولی، بلکې یوازې تاسو خپله کولی شی چې ځان خوشاله کړی.
د زړه کړکۍ مو د ښېګڼو پر مخ پرانيزئ.
د «مننه» کلمه ډېره کاروئ.
د «ښه» او «بلې» پر ځای د «په سترګو» له جملې څخه ګټه اخلئ.
هڅه وکړئ چې تل ښه کارونه ترسره کړی او دې لړۍ ته دوام ورکړئ.
له ډوډۍ خوړلو مخکې په دعا سره د الله شکر پر ځای کړئ.
له خپلو کارکوونکو او همکارانو سره صمیمي اوسئ.
له خپل ځان سره مینه وکړئ.
سهار پر ښو او نېکو کارونو پیل کړئ.
نورو ته مینه ورکړئ.
هیلې مه بايلئ.
څه چې نه لری، پروا يې مه لرئ.
د الله له ټولو بنده ګانو سره يو شان مینه وکړئ.
داسې څه ترسره کړئ چې ان سپوږمۍ درته وخاندي.
تر وسې پورې نورو ته خیر ورسوئ.
د خدای پاک پر نعمتونو شکر وباسئ.

د کبانو غوښه د زړه روغتیا تضمینوي

دوشنبه, 23 دلو 1396 06:15

د برېټانیا په لېسټر پوهنتون کې شوې څېړنې ښيي، چې د کب پروټین د زړه د روغتیا لپاره ګټور تمامېږي. څېړنو په کبانو کې موجود پروټین د زړه او وینې د رګونو په درملنه او دغه راز د مغزي سکتې، د زړه حملې او د زړه د ضعف په مخنیوي کې اغېزناک بللي دي. د کبانو پروټین چې پېټید هم ورته وايي، په ځينو پلورنځیو کې پلورل کېږي. تر دې مخکې د امریکا د زړه ناروغیو ټولنې ویلي وو چې د کب پروټین نااشباع شوي غوړ او امېګا ۳ غوړ اسیدونه لري، چې ټول د زړه لپاره ګټور دي. د دې ټولنې له خوا په چاپ شوې مجله کې راغلي، چې لږ تر لږه په اونۍ کې یو ځل باید د کب غوښه وخوړل شي. د کبانو غوښه د نارینه و جنسي ځواک هم پیاوړی کوي. د کب غوښه د وينې د زياتوالي، پاکوالي او په ځانګړې توګه د اعصابو لپاره ډېره ګټوره ده. ډاکټران وایي، هغه څوک چې د اعصابو ستونزه لري، په اونۍ کې باید هرو مرو يو ځل د کب غوښه وخوري.

 

څپې او وختونه

راسره ملګري شئ

د سپوږمۍ راډیو اپلیکشن

Spogmai App   Spogmai App