افغانستان

Latest News

په نړۍ کې ۴۳ سلنه ژبې له خطر سره مخ دي

چهارشنبه, 02 حوت 1396 10:36

ملګرو ملتونو د مورنۍ ژبې د ورځې په مناسبت په خپره کړې څېړنه کې ویلي، چې په ټوله نړۍ کې ۴۳ سلنه ژبې د ورکېدو له ګواښ سره مخ دي. د څېړنې له مخې په ټوله نړې کې نږدې ۶ زره ژوندۍ ژبې موجودې دې چې له دې ډلې یې ۴۳ سلنه ژبو ته خطر متوجه دی. په راپور کې راغلي، چې په ټوله نړۍ کې څو ګوتې په شمار ژبې په ساینس، علم او زده کړه کې کارول کېږي او یوازې ۱۰۰ ژبې په ډيجټل وسایلو کې کارول کېږي. د ملګرو ملتونو د معلوماتو له مخې ژبې د فرهنګ، اړیکو او نورو مسایلو لپاره ډېرې اړینې دي، خو د ګلوبلایزشن روان چټک بهیر به ځينې ژبې له خطر سره مخ کړي او ځينې ښايي له منځه لاړې شي. ملګرو ملتونو ویلي، چې د ژبو د ساتنې او پایښت لپاره باید وګړو ته پخپلو مورنیو ژبو د زده کړو، راکړو ورکړو او اړیکو زمینه برابره کړل شي.

پښتونخوا کې لاریونوال: د پوره ازادۍ تر لاسته راوړلو پورې لاریونونو ته دوام ورکوو

چهارشنبه, 02 حوت 1396 10:36

په اسلام اباد کې د نقیب مسید د وژنې پر ضد د شویو پراخو لاریونونو نه وروسته په ټول پاکستان کې د پښتنو د لاریونونو لمنه ورځ تر بلې پراخیږي. د کرښې ها غاړه پښتانه د پښتنو دا لاریونونه ملي پاڅون بولي او په دې باور دي چې دا یې د پاڅون پیلامه ده او له همدې لارې به خپلو منطقي موخو ته ځان رسوي. د دغو پښتنو لاریونوالو مهمې غوښتنې دا دي چې د کرښې ها خوا دې د پښتنو د وژنو لړۍ ودرول شي، پوځ دې په امنیتي پوستو د پښتنو د ځورورولو څخه لاس واخلي، د پښتنو په ناقانونه وژنو کې ککړ ټول عناصر دې محکمو ته راکش کړل شي او د ازاد ژوند کولو حق دې ورکړل شي. که څه هم پاکستاني رسنیو د پښتنو دغو پراخو لاریونونو ته هیڅ انعکاس نه دی ورکړی خو په ټولنیزو رسنیو د پښتنو د دغه لاریون په پلوي غږونه پورته کیږي او د پنجابي ادارې پر وړاندې د پښتنو دا لاریونونه منطقي او بر حق ګڼي.

 

هرات کې ترافیکي پیښې ۲۱ کسانو ته مرګ ژوبله اړولې ده

چهارشنبه, 02 حوت 1396 08:31

د هرات امنيتي سرچينې وايي چې د دې ولايت په ادرسکن ولسوالۍ کې په يوه ترافيکي پېښه کې اته تنه مړه شوي او ديارلس نور ټپيان دي. د هرات امنيه قوماندانۍ وياند وويل چې دا پېښه نن سهار شاوخوا پنځه بجې يو فلاينکوچ موټر له هرات نه فارسي ولسوالۍ ته په لاره و چې د ادرسکن ولسوالۍ په صحرا سرخک سيمه کې ټکر شو. نوموړي زياته کړه چې په دې ترافيکي پېښه کې اته تنه مړه شوي او ١٣ نور ټپيان دي. د پېښې قربانيانو کې څلور ښځې، دوه ماشومان او دوه نارينه شامل دي. د هرات امنيې قوماندانۍ وياند زياته کړه چې د پېښې ټپيان د پوليسو له لوري روغتيايي مرکزونو ته لېږدول شوي او روغتيايي وضعيت يې د ډاډ وړ دى.

د نړیوالو چارو چینایي کار پوه: روسیه او پاکستان کولی شي افغان سوله کې رغنده رول ولوبوي

چهارشنبه, 02 حوت 1396 08:30

پاکستان او روسیه په افغانستان کې د سولې راوستلو کې مرسته کولی شي. په نړیوالو چارو کې چینایي متخصص جیا ډونګ له CGTN ټلویزیوني چینل سره په خبرو کې د روسیې او پاکستان د اړیکو په اړه ویلي دا دواړه هېوادونه کولی شي په افغان سوله کې رغنده رول ولوبوي. نوموړي زیاته کړې، په سیمه کې د پاکستان او افغانستان اړیکې پر یو بل ډیرې اغیزې لري او دواړه هیوادونه باید په ګډه هم د سولې او هم د ترهګرۍ ضد مبارزې برخه کې همکاري وکړي. جیا ویلي پاکستان او روسیه هم ګډې ګټې لري او کولی شي په افغان سوله کې خپل رول په پوره توګه ادا کړي. نوموړي ټینګار کړی، چې دا دواړه هېوادونه په عین حال کې د افغان سولې په اړه درې اړخیزه پروسه لري او له دې پروسې نه ملاتړ کولی شي په افغانستان کې وضعیت کنټرول کړي. جیا ډونګ دغه راز ویلي، روسیه او پاکستان نورې ګزینې هم لري چې په خبره یې کولی شي طالبان د سولې خبرو ته حاضر کړي.

 

Popular News

د هرات امنيتي سرچينې وايي چې د دې ولايت په…
د هلمند او پکتيا لسګونه اوسېدونکو او چارواکو د بېلابېلو…

جمعیت ګوند: له ۱۸ ورځني ځنډ وروسته له ارګ سره بیا خبرې پیلوو

چهارشنبه, 02 حوت 1396 08:28

جمعیت وایي له ارګه سره له ۱۸ ورځو ځنډ وروسته بیا خبرې پیلوي. د جمعیت ګوند مرکچي پلاوي ویلي، دوی هیله‌ مند دي چې دا ځل به یې خبرې مثبته پایله ورکړي. د ولسمشرۍ ریاست د دغو خبرو په اړه له ډېر څه ویلو نه ډډه کوي، خو د سیمه‌ ییزو ارګانونو خپلواکې ادارې ویاندې منیرې یوسف ‌زاده د سمنګان د نوي والي د کار د پیلېدو په اړه وویل، چې د جمعت اسلامي ګوند د اجرائیه مشر او د بلخ د لرې کړل شوي والي عطا محمد نور د لانجې په اړه خبرې روانې دي او دغه ستونزه به هم ډېر ژر هواره شي. د سیمه ییزو ارګانونو خپلواکې ادارې ویاندې دغه راز د جمعیت ګوند هغه ادعا هم رد کړه چې ویلي وو د سمنګان پخواني والي عبدالکریم خدام له ملي یووالي حکومت سره د جوړ جاړي په پایله کې دنده پرې ایښې ده.

 

روسیه او پاکستان: امریکا په افغانستان کې له داعش سره جدي مبارزه نه کوي

چهارشنبه, 02 حوت 1396 04:26

روسیه وایي امریکا په افغانستان کې له داعش ډلې سره په مبارزه کې جدي نه ده. د روسیې د بهرنیو چارو وزیر له خپل پاکستاني سیال سره په ګډه خبري غونډه کې ویلي، چې په افغانستان کې د زرګونه داعشیانو حضور خطرناک دی او باید پر وړاندې یې مبارزه وشي. پاکستان او روسیې دواړو ټینګار کړی، چې امریکا په افغانستان کې دداعش ډلې ضد مبارزه کې رښتینې نه ده او ددوی پر وړاندې جدي اقدامات نه کوي. د سرګي لاوروف په خبره له بده مرغه امریکا له سره په افغانستان کې دداعش ډلې حضور نه مني، په داسې حال کې چې ددغه ډلې زرګونه غړي هڅه کوي په افغانستان کې ځان تیار کړي او د منځنۍ اسیا هېوادونو ته د ننه شي. پاکستان او روسیې هوکړه کړې، چې دداعش ډلې پر ضد به یو پوځي کمېسیون جوړوي او دغه کمېسیون به د یادې ډلې پر ضد مبارزه کوي. مسکو یو ځل بیا له امریکا وغوښتل چې په افغانستان کې له ترهګرۍ سره په مبارزه کې رښتینې شي او روان بحران ته د پای ټکی کېږدي.

 

حکومت راتلونکې ټاکنې نه ترسره کوي، د واک دوام غواړي

چهارشنبه, 02 حوت 1396 04:25

له روان سیاسي کړکیچ څخه د وتلو لپاره د ملي توافق حکومت ترنامه لاندې طرح وړاندې شوه. د ملي توافق حکومت طرح چې د یوه مدني بنسټ له لوري چمتو شوې، په هېواد کې د ملي اجماع د رابللو غوښتنه کوي او وایي د طالبانو په شمول دغه ملي اوسیاسي اجماع به د راتلونکي حکومت د رهبرۍ د ټاکلو صلاحیت ولري. په دې ناسته کې رابلل شوي افغان سیاستوال وایي، ملي یووالي حکومت د ټاکنو د ترسره کېدو اراده نه لري او په کور د ننه د تقابل په رامنځ ته کولو سره د واک د دوام په فکر کې دی. دغه بنسټ وایي، د یوه ملي توافقي حکومت د رامنځ ته کېدو لپاره به لومړی د وسله والو طالبانو په ګډون د ټولو هېواد په کچه ملي اجماع رابلل کیږي او له هغه وروسته به د راتلونکي حکومت د څرنګوالي په تړاو پریکړه کیږي. دوی وایي، د ملي یووالي حکومت مسولانو له خلکو سره پر کړو ژمنو عمل نه دی کړی او له دې وروسته باید خلک په خپله د خپلې راتلونکې په تړاو پریکړه وکړي. د ناستې ګډونوالو ویلي، اوسني حکومت خپل سیاسي او حقوقي مشروعیت له لاسه ورکړی او د تېرې یوې نیمې لسیزې مهمې لاسته راوړنې یې له ګواښ سره مخ کړې دي.

 

هلمندیانو او پکتیاوالو هم د الکترونیکي تذکرو د ژر وېش غوښتنه وکړه

چهارشنبه, 02 حوت 1396 04:25

د هلمند او پکتيا لسګونه اوسېدونکو او چارواکو د بېلابېلو غونډو په ترڅ کې په برېښنايي تذکرو کې د افغان او اسلام کلمو پر ليکلو ټينګار وکړ. د اړوندې موضوع په اړه پرون د هلمند په مرکز لښکرګاه کې غونډه جوړه شوې وه. په دې غونډه کې د مشرانو جرګې غړي محمد هاشم الکوزي وويل چې د برېښنايي تذکرو په برخه کې هر څه قانون روښانه کړي او هر څوک چې په دې برخه کې ستونزې جوړوي، د قانون له مخې مجرمين دي. د الکوزي په وينا، د افغان کلمه د افغانانو ملي هويت دى او که هر څوک يې پر وړاندې خنډ جوړوي نو ملت به يې مقابله وکړي. په دې غونډه کې د هلمند مرستيال والي بسم الله روحاني وويل چې په ټول هېواد کې ډېر لږ کسان د برېښنايي تذکرو د وېش او افغان کلمې له ليکلو سره مخالفت کوي. دغه راز د يو بل خبر له مخې، د پکتيا د ولايتي شورا غړو، قومي مخورو او ځوانانو په يوه ګډ خبري کنفرانس کې د برېښنايي تذکرو د وېش ملاتړ وکړ او له دولته يې وغوښتل چې دا لړۍ ولايتونو ته هم وغځوي. د دوی په خبره، برېښنايي تذکرې يوه ملي مسئله ده او هغه کسان يې وغندل چې د دې پروسې پر وړاندې خنډ جوړوي. دوی د هغو کسانو غندنه هم وکړه چې د مرکزي دولت د پرېکړې پر وړاندې دريږي او په دې برخه کې د دولت د جدي اقدام غوښتنه کوي.

 

څپې او وختونه

راسره ملګري شئ

د سپوږمۍ راډیو اپلیکشن

Spogmai App   Spogmai App